លោក កើត រិទ្ធ បានបញ្ជាក់ដែរថា ការប្រកាសឱ្យចូលកាន់តំណែង ក្រុមប្រឹក្សាខេត្តបាត់ដំបង អាណត្តិទី៤នាពេលនេះ បានធ្វើឡើងស្របតាមច្បាប់របស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប
មិនឱ្យលើស ក្នុងរយៈពេល១៤ថ្ងៃ បន្ទាប់ពី គ.ជ.ប បានប្រកាសលទ្ធផលជាផ្លូវការនៃការបោះឆ្នោតជ្រើសរើសសមាជិកក្រុមប្រឹក្សា ។
លោក កើត រិទ្ធ បានរម្លឹកថា យោងតាមលទ្ធផលផ្លូវការ ដែលគ.ជ.ប បានប្រកាសកាលពីថ្ងៃទី៤ ខែមិថុនា ឆ្នាំ២០២៤ សម្រាប់ខេត្តបាត់ដំបង ក្នុងចំណោមអសនៈក្រុមប្រឹក្សាខេត្ត ទាំងអស់ចំនួន២៧អសនៈ គណបក្សប្រជាជនកម្ពុជា ទទួលបាន ២៤ អសនៈ និងគណបក្សឆន្ទៈខ្មែរ ទទួលបាន ៣ អសនៈ ។
លោក បានគូសបញ្ជាក់ថា ក្នុងនាមសមាជិក សមាជិកា បានជាប់ឆ្នោត បើទោះបីជាមានសមាសភាពមកពីគណបក្សនយោបាយផ្សេងគ្នា ក៏ពិតមែន ក៏ប៉ុន្តែតាមគោលការណ៍ច្បាប់បានកំណត់ថា ក្រុមប្រឹក្សា គឺជាតំណាងឱ្យប្រជាពលរដ្ឋក្នុងខេត្តបាត់ដំបង របស់យើងទាំងមូល ។ នៅពេលនេះទោះបីជាក្រុមប្រឹក្សានៅថ្នាក់ក្រោមជាតិត្រូវបានជ្រើសរើសតាមរយៈការបោះឆ្នោតមិនផ្ទាល់ក្តី ក៏ក្រុមប្រឹក្សាថ្នាក់រដ្ឋបាលនៅថ្នាក់ក្រោមជាតិ គឺជាផ្នែកមួយនៃអំណាចនីតិប្រតិបត្តិ និងមានស្វ័យភាពក្នុងក្របខ័ណ្ឌ ដែលកំណត់ដោយច្បាប់ លិខិតបទដ្ឋានគតិយុត្តិជាធរមាន ក្នុងការគ្រប់គ្រងនិងចាត់ចែងកិច្ចការក្នុងមូលដ្ឋានរបស់ខ្លួន ដើម្បីឆ្លើយតបតាមតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួនប៉ុណ្ណោះ ដូច្នេះ ក្នុងការអនុវត្តន៍ការងារនេះ សមាជិក សមាជិកាក្រុមប្រឹក្សាទាំងអស់ ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ដោយស្មើភាព តម្លាភាព គណនេយ្យភាព សមធម៌ និងបរិយាប័ន្ន ជាពិសេសមិនត្រូវប្រកាន់និន្នាការនយោបាយណាមួយឡើយ ។
សូមបញ្ជាក់ថា យោងតាមព្រះរាជក្រឹត្យ ដែលឡាយព្រះហស្តលេខា ដោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ទទួលស្គាល់សមាសភាពក្រុមប្រឹក្សាខេត្តបាត់ដំបង ក្នុងអាណត្តិទី៤នេះ មានចំនួន២៧រូប ក្នុងនោះ លោក អ៊ុយ រី ជាប្រធានក្រុមប្រឹក្សាខេត្តបាត់ដំបង ៕
