កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បន្តសហការជាមួយកម្លាំងចម្រុះ ធ្វើសកម្មភាពបង្ក្រាបបទល្មើសនេសាទ ក្នុងរដូវហាមឃាត់ !
ដោយអនុវត្តតាមបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងការណែនាំរបស់ឯកឧត្តមអភិបាលខេត្ត ប្រធានគណ:បញ្ជាការឯកភាពរដ្ឋបាលខេត្ត កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានបន្តសកម្មភាពយ៉ាងសកម្ម ក្នុងការសហការជាមួយកម្លាំងចម្រុះ ធ្វើសកម្មភាពបង្ក្រាបបទល្មើសនេសាទខុសច្បាប់ នៅក្នុងរដូវហាមឃាត់ ក្នុងភូមិសាស្ត្របឹងទន្លេសាប ស្ថិតនៅក្នុងឃុំផាត់សណ្ដាយ ស្រុកកំពង់ស្វាយ និងឃុំពាមបាង ស្រុកស្ទោង ខេត្តកំពង់ធំ ។
ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយស្ថាប័នជំនាញ និងអាជ្ញាធរដែនដី ក៏បានធ្វើការផ្សព្វផ្សាយជូនប្រជាពលរដ្ឋ នូវលិខិតជូនដំណឹងលេខ១,២៧១ ជ ផ ស្ដីពី រដូវបិទនេសាទឆ្នាំ២០២៥ របស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ដោយចាប់អនុវត្តពីថ្ងៃទី១ ខែមិថុនា ដល់ថ្ងៃទី៣០ ខែកញ្ញា ឆ្នាំ២០២៥ នៅក្នុងតំបន់បឹងទន្លេសាប ជូនប្រជាពលរដ្ឋនៅក្នុងភូមិសាស្ត្រទទួលខុសត្រូវ ផងដែរ។
ឧត្តមសេនីយ៍ទោ សោម ស៊ុន បានប្ដេជ្ញាចិត្តដាច់ខាត ក្នុងការអនុវត្តតាមបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់ បន្តចូលរួមអនុវត្តឲ្យទទួលបានជោគជ័យ ក្នុងការបង្ក្រាបបទល្មើសនេសាទខុសច្បាប់ មិនឲ្យកើតមានឡើងជាថ្មី ដោយគ្មានការដកថយឡើយ ដើម្បីផលប្រយោជន៍របស់ប្រជាជនកម្ពុជាទូទាំងប្រទេស និងសម្រាប់កូនចៅយើងជំនាន់ក្រោយៗទៀត៕ដោយលោក សំនៀង អង្គភាព ប្រម៉ាញ់ជាយដែន tv
Post a Comment