លោកឧត្តមសេនីយ៍ទោ ដាញ់អេងប៊ុនចាន់ ស្នងការនគរបាលខេត្តបាត់ដំបងបានមានប្រសាសន៍ពាក្យពេចន៍ដ៏ល្អ សូមមន្រ្តីយើងកុំមើលឃើញតែប្រាក់ពេក

សូមកុំមើលឃើញតែប្រាក់ពេកគឺជាពាក្យរំលឹកដាស់តឿនរបស់លោកឧត្តមសេនីយ៍ទោ ដាញ់ អេងប៊ុន ចាន់ ស្នងការនៃស្នងការដ្ឋាននគរបាលខេត្តបា​ត់ដំបង នៅក្នុងកិច្ចប្រជុំ ក្នុងថ្នាក់ដឹកនាំស្នងការដ្ឋាន ដែលមាន លោក លោកស្រី ជាស្នងការរងទទួលផែនការងារជំនាញ និងការិយាល័យចំណុះស្នងការដ្ឋានចូលរួមនាព្រឹកថ្ងៃទី ១០ ខែ មីនា ឆ្នាំ ២០២៥ នេះ។

លោកស្នងការបានលើកឡើងថា វិធានការអប់រំណែនាំ ចំពោះបងប្អូនអ្នកធ្វើដំណើរលើដងផ្លូវ បើក្នុងករណីកំហុសឆ្គង របស់គាត់តូចតាចទេ ក្នុងកម្រិតអប់រំណែនាំ ពន្យល់គាត់ឱ្យបានយល់ដឹង នោះគាត់នឹងអរគុណដល់យើងជាមន្រ្តីនគរបាលចរាចរណ៍ ហើយគាត់ចងចាំពេញមួយជីវិតនូវកំហុសឆ្គង ដែលគាត់បានធ្វើខុសដោយអចេតនា ពេលធ្វើដំណើរលើដងផ្លូវ។ លោកស្នងការបានបន្ថែមថា ពេលខ្លះបងប្អូនប្រជាពលរដ្ឋលោកធ្វើដំណើរពីស្រុក ស្រែចូលមកទីក្រុង ទីប្រជុំជន ម្តង ម្កាលដើម្បីបានឃើញពីការអភិវឌ្ឍន៍រីកចម្រើនរបស់ទីក្រុងយេីង លោកពិតជាមិនអាច​យល់ដឹងបានគ្រប់ជ្រុងជ្រោយនៃការធ្វើចរាចរណ៍​លើដងផ្លូវខ្វាត់ខ្វែង មានភ្លើងស្តុប និងស្លាកសញ្ញានោះទេ ពួកគាត់ខ្លាចខុសច្បាប់ ហើយក្នុងអារម្មណ៍ភ័យផង ខ្លាចផង ដូច្នេះមន្រ្តីនគរបាលចរាចរណ៍នៅ លើដងផ្លូវ សូមមេត្តាត្រឹមតែធ្វើការអប់រំណែនាំ ឱ្យគាត់បានយល់អំពីកំហុសនេះពាក់ព័ន្ធជាមួយនឹងច្បាប់ចរាចរណ៍បានហើយ រួចអនុញ្ញាតិឱ្យគាត់ បន្តដំណើរទៅចុះ សូមកុំផាកពិន័យអី សូមកុំមើលឃើញតែប្រាក់ពេក​ នេះជាការរំលឹកដាស់តឿន​៕ផ្សាយដោយ អង្គភាពគេហទំព័រ ប្រម៉ាញ់ជាយដែនធីវី