ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការីគោរពវិញ្ញាណក្ខន្ធសពវិរៈយុទ្ធជនពលីក្នុងសមរភូមិព្រំដែនកម្ពុជា ថៃ នៅស្រុកស្ទោង ខេត្តកំពង់ធំ!
កំពង់ធំ៖ នៅព្រឹកថ្ងៃទី២០ ខែសីហា ឆ្នាំ២០២៥ ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយលោកសាយ គឹមឡម អភិបាលស្រុកស្ទោង បានដឹកនាំសហការីទៅគោរពវិញ្ញាណក្ខន្ធសពវិរៈយុទ្ធជនពលីលោក វរសេនីយ៍ត្រី ជួង លាប នៅអង្គភាពកងពលតូចថ្មេីរជេីងលេខ៤២ ចំណុះយោធភូមិភាគទី៤ ដែលបានពលីជីវិតកាលពីថ្ងៃទី២៤ ខែ កក្កដា ឆ្នាំ២០២៥ ក្នុងសមរភូមិការពារបូរណភាពទឹកដីនៅទិសព្រំដែនកម្ពុជា.ថៃ តំបន់ប្រាសាទតាមាន់ ខេត្តឧត្ដរមានជ័យ ដែលពិធីនេះប្រព្រឹត្តទៅនៅគេហដ្ឋាននៃសព ភូមិបុស្សតាសោម ឃុំរុងរឿង ស្រុកស្ទោង ខេត្តកំពង់ធំ ។
ឧត្ដមសេនីយ៍ទោ សោម ស៊ុន បានថ្លែងនូវការសោកស្ដាយអាឡោះអាល័យជាពន់ពេកចំពោះការបាត់បង់វិរៈយុទ្ធជនរបស់យើងដែលបានលះបង់អាយុជីវិតដ៏អង់អាចខ្លាហាននៅក្នុងសមរភូមិ ដេីម្បីបុព្វហេតុការពារបូណភាពទឹកដី និងការពារប្រជាជនកម្ពុជា ពីការបំពានទឹកដីរបស់កម្ពុជាពីសំណាក់យោធាសៀម ហើយការលះបង់ដ៏ធំធេងនេះ យើងខ្ញុំទាំងអស់គ្នាជាប្រជាជនកម្ពុជាចងចាំជានិច្ចមិនអាចបំភ្លេចបានឡើយ ។
ជាមួយនេះផងដែរ ឧត្ដមសេនីយ៍ទោសោម ស៊ុន ក៍បានសំណេះសំណាល និងជម្រាបជូនក្រុមគ្រួសារសពថា សម្តេចមហាបវរធិបតី ហ៊ុន ម៉ាណែត ប្រមុខនៃរាជរដ្ឋាភិបាល និងប្រជាជនកម្ពុជាចងចាំជានិច្ចនូវគុណូបការ:ដ៏ថ្លៃថ្លានេះ ចារឹកទុកជាប្រវត្តិសាស្រ្ត និងរៀបចំដោះស្រាយគោលនយោបាយ ឧបត្ថម្ភជូនក្រុមគ្រួសារសពឲ្យបានសរម្យ និងពិនិត្យមើលអំពីស្ថានភាពផ្ទះរបស់វីរយុទ្ធជនពលីយេីង ដើម្បីរៀបចំសាងសង់ផ្ទះថ្មីជូនគាត់ ឲ្យមានជម្រកស្នាក់នៅបានសមរម្យ ។
ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងនូវការគោរពដឹងគុណមិនអាចបំភ្លេចបាន នូវវិរភាពអង់អាចក្លាហានក្នុងការការពារបូរណភាពទឹកដីនេះ ដោយបានលំអោនកាយគោរពវិញ្ញាណក្ខន្ធ ដោយក្តីក្តុកក្តួលរំជួលចិត្ត ជាទីបំផុត និងបានសូមបួងសួងដល់វិញ្ញាណក្ខន្ធវិរៈយុទ្ធជនយេីង បានទៅកាន់សុគតិភពកុំបីឃ្លៀងឃ្លាតឡើយ ៕
ដោយ លោក សំនៀង
Post a Comment