(ខេត្តកំពង់ឆ្នាំង)៖ កសិដ្ឋានដាំបន្លែក្នុង ទុយយោលើទឹក( អេជវ័ន ហៃដ្រូផូនិក ) កើតមានថ្មីមួយទៀតហើយ ស្ថិតនៅក្នុងភូមិទួលខ្សាច់ ឃុំជ្រៃបាក់ ស្រុករលាប្អៀរ ដែលទើបតែដំណើរ ការបានជាង៤ខែ និងកំពុងដំណើរ ការឆ្ពោះទៅរកភាពជ័យ ដោយសារតែ ម្ចាស់កសិដ្ឋាននេះ ជានិស្សិតកសិកម្ម ធ្លាប់ទៅរៀនបច្ចេកទេសកសិកម្ម នៅប្រទេសអ៊ីស្រាអែល។
លោក ជ័យ វាសនា ជាបុគ្គលិកកសិដ្ឋាន ខាងលើនេះ នៅព្រឹកថ្ងៃទី២៩ ខែវិច្ឆិកា ឆ្នាំ២០១៩ បាននិយាយឲ្យដឹងថា ម្ចាស់កសិដ្ឋានមួយនេះ ឈ្មោះ លោក ចាប វិបុល ធ្លាប់និយាយឲ្យដឹងថា លោកជានិស្សិតកសិកម្ម ទៅរៀនបច្ចេក ទេសកសិកម្មនៅ ប្រទេសអ៊ីស្រាអែល។
កន្លងមក ដោយមានចំណូលចិត្ត លើការងារកសិកម្ម តែខ្វះដើមទុន លោកក៏បានដាក់ ភាគហ៊ុន៣នាក់ គឺ ១.ម្ចាស់ដី, ២.ម្ចាស់ទុន ,និង ៣គឺរូបលោកជាអ្នក មានបច្ចេកទេសដាំដុះ បានឯកភាពគ្នា កសាងរោងកសិដ្ឋាន ដាំបន្លែនេះឡើង នៅលើដីទំហំ១២គុណនិង២៧ម៉ែត្រ អស់ទឹកប្រាក់ ជិត២ម៉ឺនដុល្លារ នៅក្នុងខែកក្កដា កន្លងមកនេះ។
កសិដ្ឋានដាំ បន្លែលើទឹកនេះ បានចាក់សាបពីក្រោម និងធ្វើដំបូល និងជញ្ជាំងបាំងដោយ សំណាញ់ការពារកម្ដៅ និងការពារសត្វល្អិត បំពាក់ប្រព័ន្ធទុយ យោម៉ាស៊ីនបូមទឹក និងប្រព័ន្ធសាចទឹក តាមស្តង់ដារ ទិញពីប្រទេសថៃ និងបំពាក់ផ្ទាំង កញ្ចក់សូឡា ប្រើភ្លើងបូមទឹក ដោយពន្លឺព្រះអាទិត្យ។
ចំណែកពូជបន្លែ ប្រើពូជនៅក្នុងស្រុកខ្លះ និងពូជពីប្រទេសថៃខ្លះ ហើយបានដំណើរការ ដាំដុះបន្លែមាន សាលាដធម្មតា សាលាដក្រហម ស្ពៃកាឆយ និងខាត់ណា និងបេះលក់បាន២ លើកមកហើយ មានតម្លៃ ក្នុង១គីឡូក្រាម ពី៨០០០រៀល ទៅ១២០០០រៀល ដែលអ្នកកុម្ម៉ង់ ទិញមួយចំនួន គឺជាម្ចាស់អាហារដ្ឋាន និងមួយចំនួនជា អតិថិជននៅ ក្នុងមូលដ្ឋាន ដោយក្នុង១ខែៗ អាចលក់បានថវិកា ប្រមាណ១ពាន់ដុល្លារ។
លោក ជ័យ វាសនា បានឲ្យដឹងទៀតថា ចំពោះការដាំ ដុះថែទាំវិញ ក៏មិនស្រួល ប៉ុន្មានដែរ គឺត្រូវតាមដានប្រព័ន្ធ បូមទឹកជាប្រចាំ និងពិនិត្យមើល PHទឹក ក្នុង១ថ្ងៃ៣ដង គឺបើខ្វះPH ស្លឹកបន្លែនឹង ស្លោកផ្នែកខាងក្រោម ហើយការដាំដុះ នេះមិនប្រើជីគីមីឡើយ។
ចំណែកពេល វេលាដាំដុះវិញមាន រយៈពេលពី១ខែ ទៅ១ខែកន្លះ ទើបទទួលផល ចំពោះការទិញយកទៅទទួលទាន គឺបន្លែនេះទុក បានយូរថ្ងៃ និងមានឱជារស ឆ្ងាញ់ពិសា មិនប៉ះពាល់សុខភាពឡើយ។
ដូច្នេះបើត្រូវការ អាចមកទិញបាន មានទីតាំងនៅ ខាងជើងវត្តទួលខ្សាច់ ក្នុងភូមិទួលខ្សាច់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង៕