បន្ទាយមានជ័យ៖ ភ្លៀងធ្លាក់ជាបន្តបន្ទាប់ រួមទាំងប្រទេសថៃបើកទំនប់បង្ហូរទឹកធ្លាក់ ប្រជាពលរដ្ឋរស់នៅតាមបណ្តោយអូរព្រំដែនជិត៧០០គ្រួសារ ត្រូវបានជម្លៀសមកទីទួលសុវត្ថភាពចំនួន៥កន្លែងនៅក្នុងក្រុងប៉ោយប៉ែត នៅថ្ងៃទី១៨ ខែតុលា ឆ្នាំ២០២០នេះ។
លោក គាត ហ៊ុល អភិបាលក្រុងប៉ោយប៉ែត បានប្រាប់ថា គិតត្រឹមម៉ោង៦ល្ងាច ថ្ងៃទី១៨ ខែ តុលា ឆ្នាំ២០២០ ប្រជាពលរដ្ឋរងការជន់លិចដោយសារទឹកជំនន់ នៅក្នុងភូមិសាស្ត្រក្រុងប៉ោយប៉ែត ដែលត្រូវជម្លៀសចេញពីលំនៅឋាន មាន១២ភូមិ សង្កាត់ប៉ោយប៉ែតមានចំនួន ៤ភូមិ សង្កាត់ផ្សារកណ្តាល ៤ភូមិ និងសង្កាត់និមិត្ត ៤ភូមិ ដែលមានចំនួនពលរដ្ឋជម្លៀសសរុបចំនួន៦៨០គ្រួសារ មកទីទួលសុវត្ថភាពចំនួន៥កន្លែង។
លោក បញ្ជាក់ថា ទឹកជំនន់ដែលធ្វើឲ្យជន់លិចនេះ បណ្តាលមកពីភ្លៀងធ្លាក់ជាប់ៗគ្នា និងការបើកទំនប់បង្ហូរមកពីស្រុកអរញ្ញ ខេត្តស្រះកែវប្រទេសថៃ។ លោកបានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ចំពោះទឹកជំនន់ និងណែនាំឲ្យកងកម្លាំងត្រៀមជួយជម្លៀសពលរដ្ឋបន្តទៀត ខណៈដែលភាគថៃផ្តល់ព័ត៌មានថានិងបើកមុខទឹកបន្ថែមដែលប្រទេសថៃកំពុងរងការជន់លិចដូចគ្នា៕
