បន្ទាយមានជ័យ៖លើផ្លូវជាតិលេខ៥ចំនុចស្រះអ៊ិនតាំ ក្នុងភូមិទឹកថ្លា សង្កាត់ទឹកថ្លាក្រុងសិរីសោភ័ណ កម្លាំងនគរបាលដឹកនាំដោយលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ លោកឧត្តមសេនីយ៍ ង៉ាន់ ចិន្ដា ស្នងការរងទទួលបន្ទុកសាធារណៈ ចុះអនុវត្តតអនុក្រឹតលេខ ៣៩ ស្តីពីការពិន័យអន្តរការណ៍ចំពោះអំពើល្មើសនឹងច្បាប់ចរាចរណ៍ផ្លូវគោកនាថ្ងៃទី ១ ឧសភា ២០២០។
នេះជាឱសានវាទនៃការអនុគ្រោះចំពោះអំពើល្មើសនឹងច្បាប់ចរាចរណ៍ផ្លូវគោកនេះបើតាមការបញ្ជាក់របស់លោកឧត្តមសេនីយ៍ទោ អាត់ ខែម។
លោកស្នងការបានបន្តថា ក្នុងថ្ងៃដំបូងនេះ នគរបាលចរាចរណ៍ផ្លូវគោកខេត្តនិងស្រុកកក្រុងបានដាក់គោលដៅរឹតបន្តឹងការអនុវត្តចរាចរណ៍ផ្លូវគោក៩កន្លែង។ គឺនៅថ្នាក់ខេត្តបូកនឹងក្រុងសិរីសោភ័ណ ១កន្លែងលើផ្លូវជាតិលេខ៥ ដោយធ្វើការត្រួតពិនិត្យលើយានយន្តគ្រប់ប្រភេទ ។
និង១កន្លែងៗនៅលើផ្លូវជាតិនិងផ្លូវខេត្តនៃ៨ស្រុកក្រុងទៀត ដោយត្រួតពិនិត្យតែលើម៉ូតូសិន។
ឯកឧត្តម ស្នងការបន្ថែមថា: អ្នកបើកបរត្រូវមានឯកសារចាំបាច់បំផុតដែលត្រូវមានក្នុងពេលបើកបរក្នុងពេលដែលសមត្ថកិច្ចកំពុងរឹតបន្តឹងសុវត្ថិភាពចរាចរណ៍ផ្លូវគោក សូមបងប្អូនប្រជាពលរដ្ឋ និងក្មួយៗយកចិត្តទុកដាក់ពិនិត្យរថយន្តរបស់ខ្លួនថាតើដល់ថ្ងៃឆៀកហើយឬនៅ? បើដល់ហើយត្រូវយកទៅឆៀកអោយបានទាន់ពេល ចៀសវាងការផាកពិន័យក្នុងពេលបើកបរ។ ព្រោះតម្រូវការឆៀកនេះ គឺដើម្បីធានាសុវត្ថិភាពរថយន្តរបស់បងប្អូនក្នុងពេលបើកបរមិនបង្កគ្រោះថ្នាក់ផ្សេងៗ និងបង្ការបំពុលបរិស្ថានជាដើម។
ទន្ទឹមនឹងនេះដែរ បងប្អូនត្រូវមានប័ណ្ណបើកបរជាប់នឹងខ្លួនគ្រប់ពេលក្នុងពេលបើកបរ។ ប្រសិនបើប័ណ្ណបើកបរផុតកំណត់ គឺត្រូវបន្តសុពលភាពឡើងវិញ។ ហាមដាច់ខាតបញ្ជាយានយន្តនៅលើដងផ្លូវដោយគ្មានប័ណ្ណបើកបរ ឬប័ណ្ណបើកបរផុតកំណត់ដោយមិនបានបន្តឲ្យបានត្រឹមត្រូវតាមច្បាប់ ដែលអាចប្រឈមនឹងការផាកពិន័យធ្ងន់៕
